តុលាការសាលាឧទ្ធរណ៍ កាលពីព្រឹកថ្ងៃទី៣០ ខែមេសា បានប្រកាសសាលដីកា លើសំណុំរឿងក្បត់ជាតិរបស់លោកកឹមសុខា ដោយតម្កល់ការសម្រេចរបស់តុលាការសាលាដំបូងរាជធានីភ្នំពេញ ទុកជាបានការ។ ពោលគឺអតីតមេដឹកនាំបក្សប្រឆាំង លោក កឹម សុខា ត្រូវបានផ្តន្ទាទោសឱ្យជាប់ពន្ធនាគារចំនួន ២៧ឆ្នាំ ពាក់ព័ន្ធនឹងទោសក្បត់ជាតិ។ លើសពីនេះ តុលាការសាលាឧទ្ធរណ៍ បានបន្ថែមទោស មិនឲ្យមេដឹកនាំអតីតបក្សប្រឆាំងរូបនេះ ចេញពីប្រទេសកម្ពុជា ក្នុងរយៈពេល ៥ឆ្នាំ។ ក៏ប៉ុន្តែលោកកឹមសុខា មិនត្រូវបានចាប់ខ្លួន នាំទៅឃុំឃាំងនៅពន្ធនាគារទេ។ គឺលោកកឹមសុខា ត្រូវបានឃុំខ្លួន នៅក្នុងផ្ទះ និងមិនអាចធ្វើនយោបាយឡើយ។